Ina dretgira penala en l'Ollanda ha sentenzià trais anteriurs separatists pro-russ en auta posiziun a praschun per vita duranta. Els sajan culpants d'avair sajettà giu avant otg onns l'aviun civil MH17 en l'ost da l'Ucraina. In ulteriur accusà è vegnì declerà nunculpant pervi da mancanza da cumprovas.
Condemnads betg preschents
Il 2014 era in aviun civil da las Malaysia Airlines cun 298 persunas a bord vegnì sajettà giu en l'ost da l'Ucraina. La gronda part da las unfrendas dal sgol MH17 eran da l'Ollanda. La dretgira ha proclamà la sentenzia senza ch'ils accusads fissan stads preschents. Ils trais umens èn probablamain en la Russia. I n'è betg cler, schebain els vegnan ad ir en praschun insacura.