L'anteriur minister da l'exteriur american Henry Kissinger è mort en la vegliadetgna da 100 onns. Quai communitgescha sia interpresa du cussegliaziun. Kissinger è stà minister per ils presidents Nixon e Ford ed ha en ils onns 70 influenzà fermamain la politica dals Stadis unids.
Kissinger ha giugà in'impurtanta rolla durant la guerra en il Vietnam. 1973 ha el survegnì il premi nobel da pasch ensemen cun il negoziader nord-vietnamais Le Duc Tho. Kissinger ha prendì encunter il premi, Le Duc Tho dentant betg.
Cumenzà ses temp en uffizi ha Kissinger 1969 en la regenza da Richard Nixon. El ha bandunà la tribuna da la politica da l'exteriur 1977 suenter che Jimmy Carter è entrà en uffizi. Kissinger è era suenter ses temp en la regenza americana restà activ sco cussegliader ed è s'inscuntrà anc questa stad cun il president chinais.
Kissinger è stà il figl da geniturs tudestgs-gidieus. 1938 è sia famiglia fugida dals nazis ed immigrada en ils Stadis Unids. Sco um giuven ha el cumbattì en l'armada americana e studegià suenter la guerra a Harvard e promovì 1954.
