Il socialdemocrat dal Friburg ha cuntanschi mardi a Strasbourg 117 vuschs suenter il segund scrutini, sco il president da la radunanza parlamentara Theodoros Rousopoulos ha annunzià. Ils auters candidats, Indrek Saar da l’Estonia ed il belgiais Didier Reynders han fatg 85 respectiv 46 vuschs. En tut èn vegnids inoltrads 245 cedels electorals valaivels.
En in curt pled davant il parlament ha el engrazià per il sustegn da la Svizra. El ha plinavant accentuà l'impurtanza da la democrazia, dals dretgs umans e dal stadi da dretg.
Berset è vegnì elegì sco 15avel secretari general dal Cussegl da l'Europa. Fin il cumenzament da ses uffizi ils 18 da settember resta la Croata Marija Pejcinovic Buric secretaria generala dal Cussegl da l'Europa. Gia en l’emprim scrutini ha Berset survegnì il pli bler sustegn cun 92 vuschs, suandà da Saar (78 vuschs) e Reynders (70 vuschs). Quella giada era l'absolut pli (121 vuschs) necessari per gudagnar l'elecziun.
Sper Berset sez è er la delegaziun svizra en il Cussegl d'Europa fatg fermamain lavur da lobi per l'anteriur cusseglier federal. Politichers da tut las partidas hajan s'engaschà.
Reacziuns positivas
Il Cussegl federal gratulescha a Berset tar si'elecziun sco nov secretari general dal Cussegl da l'Europa. Cun questa elecziun confermia la Svizra ses engaschi en favur dals dretgs umans – da la democrazia e dal stadi da dretg – scriva la presidenta da la Confederaziun Viola Amherd sin la plattafurma X.
Era la partida socialdemocratica gratulescha a l'anteriur cusseglier federal. Cun Berset vegnia in impurtant politicher svizzer a manar ina da las pli impurtantas instituziuns europeicas, uschia la PS. Er dad autras partidas hai dà gratulaziuns.