Europa
En l'Europa èn cunzunt la Spagna, la Frantscha e l'Italia fitg pertutgads. En quellas terras datti blers cas da corona ed era blers mortoris. Era la Russia ha autas cifras d'infectads. Là datti dentant en relaziun pauc mortoris. Las cifras da la Russia èn dispitaivlas.
Asia
En la China, nua ch'il coronavirus è derivà, è l'unda ida enavos. En la provinza Hubei nua che tut ha entschet, datti strusch pli novas infecziuns. Dapi ils 1. da matg pon ins puspè viagiar entaifer la terra.
Puspè dapli infecziuns hai dà en la Corea dal Sid, perquai èn las mesiras vegnidas pli severas. Era en l'India datti adina dapli infecziuns.
America dal Sid
L'Amercia dal Sid è il mument pertutgada ferm dal coronavirus. Tenor l'organisaziun mundiala da sanadad WHO è l'America dal Sid daventada il nov epicenter da la pandemia da corona. Il pli pertutgads èn la Brasilia ed il Peru. En la Brasilia mancan ils letgs sin la staziun intensiva.
America dal Nord
En ils Stadis Unids crescha la cifra d'infectads ed è la cifra la pli auta insumma. Bleras infecziuns datti cunzunt en las metropolas da la terra. Cunzunt a New York datti blers cas. En ils singuls stadis federativs vegn la situaziun tractada different.
Australia
En l'Australia è la cifra d'infecziuns plitost bassa. Davent ils 1. da zercladur èsi puspè pussaivel da viagiar entaifer ils stadis commembers.
Africa
En l'Africa è la situaziun in zichel autra ch'èn las autras terras. Tenor l'Organisaziun mundiala da sanadad WHO èn varga 100'000 persunas infectadas. La rata da mortoris è dentant fitg bassa cunquai che fitg blers Africans èn sut 25 onns vegls.