La Svizra na prenda per il mument betg si pli grondas gruppas da fugitivs da l'Afganistan. Las premissas per prender si fugitivs da contingent na sajan il mument betg dadas, quai scriva il Cussegl federal. La situaziun saja il mument anc memia pauc clera.
Collavuraturs locals dal DEZA pon vegnir en Svizra
La Confederaziun ha dentant decis da prender si en tut 230 persunas da l'Afganistan en Svizra. I sa tracta da 40 collavuraturas e collavuraturs locals da la Direcziun da svilup e da collavuraziun (DEZA), e lur famiglias. La Svizra emprovia cun tutta forza da purtar enavos collavuraturs locals sco er burgaisas e burgais svizzers ch'èn anc en l'Afganistan. Persunas afganas che lavurian per organisaziuns u stadis dal vest sajan potenzialmain en privel, uschia la Confederaziun. Perquai haja la Svizra sco patruna ina obligaziun ed il Cussegl federal decis da dar in visum umanitar als collavuraturs e lur famiglias.
Biro da cooperaziun dal DEZA a Kabul serrà ad interim
Suenter ch'ils talibans han surprendì la pussanza en l'Afganistan ha la Direcziun da svilup e da collavuraziun serrà ses biro da cooperaziun a Kabul per il mument. Pervia da las circumstanzas actualas na possia il biro, ch'exista dapi il 2002, betg far sias lavurs. Trais collavuraturs svizzers dal biro sajan dapi dumengia en Svizra.
Plinavant scriva la Confederaziun che l'ambassada svizra ad Islamabad ch'è responsabla per l'Afganistan saja en contact cun burgaisas e burgais svizzers ch'èn en il pajais. Enfin uss sajan 30 persunas s'annunziadas che vulan bandunar Afganistan.