Per l’ina fan ils locomotivists da la Deutsche Bahn danovamain chauma. Els pretendan tranter auter tuttina bler paja tar pli curt temp da lavur. Tenor la Deutsche Bahn saja da quintar gievgia e venderdi cun impediments massivs. Danovamain èn pia mo radund 20% dals trens a lunga distanza en acziun. En il traffic regiunal èn las consequenzas differentas. Fin venderdi a las 13:00 vegn fatg chauma. «En il traffic da viafier regiunal e S vegn – suenter la fin da la chauma – puspè extendida pass per pass la purschida fin la fin dal di», hai num. En il traffic a lunga distanza percunter vegnia pir la sonda puspè a star tut las colliaziuns a disposiziun.
En pli ha il sindicat dals locomotivists GDL annunzià da far chauma a curta vista en il futur, uschia che la Deutsche Bahn n'haja betg temp avunda da far in urari d’urgenza.
Chauma al traffic aviatic
Da l’autra vart vegni er fatg chauma tar il traffic aviatic. Millis d’emploiads da la Lufthansa na van gievgia e venderdi betg a lavurar. Tenor la societad aviatica saja da quintar che fin 90% dals sgols crodian ora. Il sindicat Verdi pretenda dapli paja ed ina premia per gulivar la chareschia per il persunal a terra.
Cunquai ch'ils locomotivists fan era chauma, n'èsi pia betg pussaivel per ils passagiers da prender enstagl il tren.
