Entras las refurmas dal dretg da lavur ch'èn vegnidas introducidas avant paucs onns, saja gia sa meglierà bler. Ma questas refurmas na sajan betg realisadas bain avunda, di Amnesty. Uschia spetgan per exempel millis lavurers sin lur pajas. Ed emploiadas da chasa lavurian savens fin a 18 uras il di, senza in di da pausa tranteren. Amnesty stima che tschients persunas sajan mortas en la gronda chalira, tranter auter sin plazzals da construcziun per il campiunadi mundial.
Katar vegn adina puspè crititgà perquai ch'il pajais violescha sistematicamain ils dretgs d'umans e nizzegia or migrantas e migrants. La regenza refusa las renfatschas e sa referescha sin las refurmas a favur dals lavurers.
Bicot dal campiunadi mundial
En Svizra ed er auters pajais han tschertas citads decidì da boicottar il campiunadi mundial da ballape en il Katar. A Vevey per exempel, na metta la citad a disposiziun nagins lieus publics per far in public viewing.