Parents da las unfrendas, politichers bosniacs e diplomat da l'exteriur han mess flurs al monument. Giasts auts dad auters stadis n'han betg pudì vegnir a la commemoraziun, pervi dal coronavirus. Persuenter hai dà pleds per video, per exempel dal secretari general da l'ONU António Guterres.
Tar la mazzacra a Srebrenica en l'ost da la Bosnia eran vegnids mazzads ils 11 da fanadur 1995 radund 8'000 umens e buobs muslims da federaziuns bosniac-serbas. L'atrocitad comessa durant la guerra da la Bosnia (1992-1995) vala sco l'emprim genocid sin plaun europeic, dapi la fin da la segunda guerra mundiala il 1945.
Il tribunal internaziunal per la Jugoslavia a Den Haag ha sentenzià ils instigaders principals da la mazzacra, l'anteriur president serb-bosniac Radovan Karadzic e l'anteriur manader da l'armada Ratko Mladic pervi da genocid. Politichers a la testa da la part serba da la Bosnia snegan fin oz l'existenza dal genocid.