En l'Australia è il dumber da las unfrendas pervi dals incendis da chagliom s’augmentà sin almain 27. In pumpier saja mort la sonda durant in'acziun en il stadi federativ da Victoria. Quai han communitgà las autoritads localas. La notg avant eran trais incendis s'unids tar in gigantic. L’incendi al cunfin da New South Wales e Victoria ha ina surfatscha ch’è bunamain uschè gronda sco il chantun Grischun.
A partir dad oz vegnì spetgà temperaturas in zic main chaudas. Quai suenter che quellas eran creschidas il venderdi sin fin 44 grads. Il incendis che furieschan dapi l'october han fin ussa destruì ina surfatscha ch'è duas giadas e mez uschè gronda sco la Svizra.
In grond incendi sut controlla
Entant è en l'Australia in dals gronds incendis da chagliom sut controlla. Quai han communitgà las autoritads localas. L’incendi en il nordvest da la metropola Sydney haja furià dapi l’october sin ina surfatscha d’in mez milliun hectaras. Quai correspunda a la surfatscha dal chantun Vallais.
Il medem mument averteschan las autoritads dentant, ch’i vegnia anc ad arder mais en l’Australia. Ils incendis che furieschan dapi l'october han fin ussa devastà ina surfatscha ch'è duas giadas e mez uschè gronda sco la Svizra.
Ord l'archiv da SRF:
RTR novitads 12:00