L'anteriur primminister talian Silvio Berlusconi è mort. Quai conferma in pledader sin dumonda da l'agentura da novitads tudestga. Medias talianas avevan gia rapportà che Berlusconi saja mort en in ospital a Milaun. El aveva 86 onns. Ils ultims onns aveva el adina puspè gì problems da sanadad ed era perquai adina puspè stà a l'ospital a Milaun l'ultim temp. Silvio Berlusconi survegn ina sepultura statala en il dom da Milaun. La sepultura è questa mesemna.
Carriera politica garnida cun scandals
Berlusconi è naschì ils 29 da settember 1936 ed è stà possessur d'in imperi da medias e dapi il 1994 en quatter regenzas talianas sco primminister. Ils ultims onns è el stà en il senat talian. Il fundatur da la partida Forza Italia aveva adina puspè procurà per lingias grassas e discussiuns cun ses numerus cas giuridics e sias relaziuns privatas.
Il 2012 era el vegnì exclus dal parlament en connex cun ina sentenzia pervi d'omissiun fiscala. Il 2015 è el vegnì acquittà en il process «Bunga-Bunga» d'abus d'uffizi e sex cun prostituadas minorennas.