En Frantscha han ils sindicats annunzià per mardi ina chauma naziunala e sur pliras branschas. Ils sindicats fan betg mo chauma per meglras cundiziuns da lavur. La regenza aveva sfurzà lavurers e lavureras che faschevan chauma da lavurar, suenter che la chauma tar raffinarias e deposits da carburants aveva chaschunà problems da tancar.
Traffic public pertutgà
Ils sindicats han perquai clamà si lur commembers da far ina chauma naziunala il mardi. Quai po pertutgar il traffic public, scolas, canortas ed il servetsch public. Tenor la SBB pudessan er intginas colliaziuns da TGV tranter la Frantscha e la Svizra mancar il mardi.
Ils sindicats pretendan che las pajas vegnan adattadas a l'inflaziun, e ch'ils lavurers survegnan ina part dal gudogn da l'industria d'ieli. L'interpresa Totalenergies ch'occupescha blers lavurers e lavureras ha fatg in plus da 10,6 milliardas euros durant l'emprima mesadad dal 2022.