Paucs dis suenter las elecziuns dispitaivlas en Gabun ha l’armada – tenor atgnas indicaziuns – fatg in putsch e cupitgà la regenza dal president Ali Bongo. Las elecziuns na sajan betg stadas crediblas ed ils resultats vegnian annullads. Las instituziuns statalas sajan vegnidas schliadas ed ils cunfins sajan vegnids serrads. Quai ha ditg ina gruppa da militars en la televisiun. La regenza n’è betg stada cuntanschibla per ina posiziun.
In da plirs putschs en la regiun
Anc curt avant aveva la cumissiun electorala declerà Bongo sco victur da l’elecziun presidenziala. Sia famiglia regia dapi 56 onns en il pajais centralafrican.
![Schuldada](https://www.rtr.ch/static/cms/images/960w/7b9015.jpg)
L’Uniun europeica è preoccupada da l’ultim svilup en Gabun: Sche questas novas vegnian confermadas, sa tractia d'in ulteriur putsch militar che destabiliseschia l'entira regiun. Quai ha ditg Josep Borrell, l’incumbensà spezial per l’exteriur da l’UE, d’in inscunter dals ministers da la defensiun da l’UE en Spagna. I dovria ina reflexiun profunda dals schabetgs da l’ultim temp en ils pajais vest-africans. Ils ultims onns hai dà putschs tranter auter en il Mali, Burkina Faso, Sudan e Niger.