La chanceliera tudestga Angela Merkel ed ils primministers dals pajais federativs èn sa cunvegnids da far quest lockdown dir sin fundament dal decurs da la pandemia.
Butias cun rauba per il mintgadi èn avertas
Davent ils 16 da december fin ils 10 da schaner èn uschia serradas tuttas butias cun excepziun da talas che vendan rauba per il basegn da mintgadi. Vitiers duain era restar serradas las scolas e las canortas d'uffants. Il lockdown è la consequenza da la situaziun da la pandemia che pegiurescha dapi emnas en Germania. Il lockdown parzial che vala dapi l'entschatta november n'haja betg tanschì, ha ditg Merkel suenter l'inscunter cun ils pajais federativs. Il schef da regenza da la Baviera, Markus Söder, ha avertì che corona saja ord controlla. Dapi intgins dis creschian las cifras puspè.
Dumber d'infectads crescha
Oz ha la Germania annunzià 20'200 novas infecziuns da corona e 321 novs mortoris. Avant in'emna era quai 17'800 novas infecziuns e 255 mortoris. I dat era ina augment da pazients sin las staziuns intensivas. Fin ussa èn 4'491 pazients vegnids tractas sin l'intensiva (stan sonda) quai èn 59 dapli ch'il di avant. 57% dad els han duvrà in apparat da respiraziun.
Ulteriuras restricziuns era en Svizra
Er en Svizra duai l’autra emna anc dar ulteriuras restricziuns. Quai ha ditg Lukas Engelberger, il president da las directuras e dals directurs chantunals da sanadad, en in’intervista cun il Tages-Anzeiger. Ils directurs e las directuras vegnian a s’inscuntrar damaun cun Alain Berset, silsuenter vegnia la populaziun infurmada. Tge mesiras ch’i duai dar n’è betg enconuschent.
