L'Australia vul crear in territori maritim protegì ch'è bunamain uschè grond sco la Spagna. Igl exista gia in territori protegì, avant la costa en il sidost dal pajais. Quel duai uss daventar trais giadas pli grond, communitgescha la regenza australiana. Il resultat fissan passa 475'000 kilometers quadrats protegids. Scumandà fiss en il nov territori protegì il pestgar e l'explotaziun da las resursas dal terren sutmarin. Cuntinuar dastgassan tschertas activitads da pestga gia existentas.
L'insla da Macquarie saja in lieu extraordinari, uschia la ministra da l'ambient, Tanya Plibersek.
Igl è in lieu da miraclas da la natira – in lieu da tratga impurtant per milliuns d'utschels da mar, da focas e da pinguins.
Sin l'insla hai plinavant in post da perscrutaziun subantarctic.
