Duri Bischoff è oriund da Ramosch e viva cun sia famiglia a Casaccia. Er sia dunna Lucrezia ha ragischs rumantschas. Sia mamma era numnadamain da Sent. Uschia ch'ils Bischoffs ch'han in bain puril midan en lur mintgadi trasora da rumantsch en bregagliot ed enavos.
Bregaglia il mecca da viandar
En questa chaussa èn Violanta Rominger dal turissem Bregaglia ed il guid da muntogna Siffredo Negrini dal medem avis. La cuntrada da la Val Bregaglia saja simplamain in paradis per viandants e raividers. Malgrà quai stoppia er il turissem en val cumbatter per lur giasts, raquinta Violanta Rominger.
Persunas servetschaivlas
Quels da Casaccia sajan persunas che sa gidian gugent, quai di Giancarlo Torriani ch'è hotelier a Beiva. El è dentant creschì si en Val Bregaglia. Giancarlo Torriani gieva magari cun ses chaval da Beiva a Casaccia, lura hajan ils da Casaccia adina gida. Per exempel sch'i vegniva la plievgia. Er durant il maraton engiadinais sajan ils da Casaccia adina al lieu per sa gidar. Insumma sajan els plitost orientads envers l'Engiadina. Er perquai che la fracziun è in zic separada dal rest da la Val Bregaglia.
Jon Bischoff – illustratur da Casaccia
«Jau fatsch ina lavur artisanala» di Jon Bischoff. L'illustratur ins pudess dentant er numnar artist. Quel titel n'ha el dentant betg uschè gugent.
«Dissegnar en val Bregaglia ha ina impurtanza enorma» di Jon Bischoff. El che viva ussa puspè en val e ch'ha fatg la via sco blers er. Bandunar la val per turnar. Sia lavur saja lavur d'artisanadi di il bab da famiglia da 35 onns. Sco artist na sa vesa el betg.
Or da l'archiv
In film animà che gioga a Casaccia, dissegnà da Jon Bischoff.
Il Mr. «Schkilift» da Casaccia
«Quels da Casaccia van meglier cun skis che tschels da la val» manegia Pietro Rezzoli. L'unic runal ni apunta l'unic «Schkilift» da la val hajan quels da Casaccia. Il runal Sur Cresta saja ideal per uffants e famiglias raquinta Rezzoli ch'è stà 20 onns president dal runal e che guarda ussa da la segirezza. In emploià fix tranter Nadal e mez mars e blers voluntaris mantegnan la purschida turistica. In grond gudogn na fetschia ins dentant betg. Vegnivan avant onns anc blers talians da Chiavenna per emprender dad ir cun skis, mancan però ussa quels. La concurrenza da Madesimo en Val Chiavenna, nua che giuvens enfin 16 onns possian ir gratuit cun skis saja memia gronda concluda Rezzoli.
RR actualitad 06:00