Blers manegian che «Handlettering» saja simplamain il pled modernisà per calligrafia. Ma quai n‘è insumma betg ils cas. Il «Handlettering» cumbinescha bleras differentas scrittiras, e la fin vegnian creads dissegns cun pleds. Quai ha ditg la manadra da curs da scriver a maun Dania Beer.
Dania Beer è oriunda da la Val Medel e dat curs da «Handlettering». Ella ch'ha sezza era emprendì quai en in curs, punctuescha però ch'in curs sco tal na tanschia betg. Be cun exercitar e bler disciplina vegnian ils resultats adina megliers, tge che motiveschia lura er da far vinavant. Mintgina e mintgin possia emprender «Handlettering», era sch'ins n'haja anc betg propi ina bella scrittira. Tut quai ch'i dovria saja: interess ed in pau creativitad.
Jau sezza n'hai insumma betg ina bella scrittira. Mintgatant na poss jau betg leger quai ch'jau hai scrit. Jau n'hai era mai dissegnà gugent. E tuttina hai jau pudì emprender il Handlettering.
Ils curs da scriver èn fitg populars. Persunas en mintga vegliadetgna vulan emprender – la gronda part è dunnas.
Sco puspè en scola – però betg sco en scola
En ils curs pon ellas empruvar ora il material, sco per exempel ils fieuters spezials – ils «Brushpens». Sumegliant sco en scola, scrivian las participantas ed ils participants lingias cun bustabs e pleds – e quai en differentas scrittiras. Quest exercizi saja impurtant per vegnir davent da la scrittira da scola. Il «Handlettering» è pli liber. I na dettia naginas reglas. Ins po far gist sco ins ha gust. La devisa è: empruvar, far ed exercitar.
Il desideri da far insatge a maun
En in temp che la digitalisaziun ha conquistà noss mintgadi è il desideri da far insatge a maun puspè qua. Per cumenzar cun il «Handlettering» na dovri betg bler material. Malgrà ch'i dat ina massa material da cumprar han ins gia tut il necessari a chasa.
Tut quai ch'ins dovra per cumenzar cun Handlettering han ins a chasa: il palpiri, in rispli ed ina gumma.
Tgi che vul empruvar il «Handlettering» e dovra ideas ed inspiraziun chatta quellas dapertut: En cudeschs e sin paginas da l'internet datti numerus exempels, tips e trics. Mintgatant possian ins schizunt sa perder en tut l'inspiraziun ed emblidia da scriver, crear e far sez. Ina finamira che blers han è da prender temp d'esser creativ. Per exempel da reservar mintga saira ina mes'ura per scriver.
Gist en il mintgadi da la lavur u famiglia ch'ins ha ina massa da far, vali fitg bler da prender temp per sasez.
