La cumissiun da giustia dal Cussegl grond ha elegì per 2 onns 3 derschadras extraordinarias en la dimensiun da 200% da plazza. La Dretgira chantunala cumbatta dapi in temp cunter in culm da pendenzas. Cun augmentar las resursas persunalas, vul la cumissiun garantir che dispitas giuridicas vegnian puspè liquidadas entaifer in temp adequat.
Pendenzas s'accumulavan
Pervia da las resursas persunalas n'èsi betg pussaivel da liquidar – sper las fatschentas quotidianas – er las pendenzas accumuladas entaifer in termin adequat. Uschia ha la Dretgira chantunala dumandà da metter a disposiziun derschaders extraordinarias per la durada da 2 onns ed en la dimensiun da 200% da plazzas. La cumissiun da giustia dal Cussegl grond ha examinà questa dumonda e vesa la necessitad d'in sustegn persunal per reducir il dumber dals cas pendents.
3 derschadras extraordinarias
Ussa ha la cumissiun da giustia pudì eleger supplementarmain per 2 onns Seraina Aebli, Andrea Bäder Federspiel e Chiara Richter sco derschadras extraordinarias. Uschia vul la cumissiun garantir che dispitas giuridicas davant la Dretgira chantunala possian vegnir liquidadas entaifer in termin adequat.
Cussegl grond ha stgaffì la basa
En la sessiun da favrer 2021 ha il Cussegl grond revedì parzialmain la lescha davart l'organisaziun giudiziala. Uschia ha'l stgaffì la pussaivladad da rinforzar las dretgiras chantunalas cun dapli persunal. La cumpetenza per eleger derschaders extraordinaris ha la lescha mess en ils mauns da la cumissiun da giustia dal Cussegl grond. Ils 15 da zercladur 2021 è questa revisiun entrada en vigur.