Cuira
Per las contribuziuns a la tgira d'uffants stattan a disposiziun en il futur 1,5 milliuns francs a Cuira. Il suveran ha approvà la cuntraproposta dal parlament e da la regenza cun bunamain dus terzs da las vuschs. L'iniziativa da la PS che vuleva in sustegn da 2 milliuns francs han ils da Cuira refusà.
Dus Gea hai dà als credits a favur dals Special Olympics World Winter Games e dal festival Big Air. Datiers da dus terzs da las vuschs han sustegnì il credit da 4,25 milliuns francs, en favur dals gieus olimpics per persunas cun impediment spiertal dal 2029. Var 56% dals da Cuira han ditg Gea al credit da 2,4 millliuns francs per il Big Air Festival.
Flem
La vischnanca investescha 4,5 milliuns francs per la scola. Cun ils daners augmenta Flem il spazi per la scola e per la structura dal di, tar la chasa da scola Surmir. Necessarias èn las investiziuns pervi dal pli grond dumber da scolaras e scolars, e pervi dal basegn augmentà tar la structura dal di.
Tusaun
La vischnanca da Tusaun po engrondir il spazi da la scola primara a Compogna. Votantas e votants han sustegnì il credit necessari da 2,62 milliuns francs cun 65% da las vuschs. Il dumber creschent da scolaras e scolars pretenda da schlargiar la scola a Compogna cun in nov tract. La radunanza communala aveva acceptà il credit il november passà.
Lantsch
Cun 75% da las vuschs s’expriman ils da Lantsch per midar l’organisaziun da la vischnanca. Da nov datti ina direcziun, che sa cumpona dal president, dal chanzlist e dal manader dal lavuratori communal. Quest gremi surpiglia intginas incumbensas operativas. Uschia duai la suprastanza survegnir dapli spazi, e pudair sa concentrar sin incumbensas strategicas.
Zezras
La vischnanca da Zezras vegn en l’avegnir manada en in sistem da direcziun, quai per distgargiar la suprastanza. Quai han decis votantas e votants a l’urna cun radund 75% da las vuschs.
Ultra da quai ha il suveran da Zezras approvà duas revisiuns parzialas da la planisaziun locala cun mintgamai radund 79% da las vuschs. L’areal «Cicero» ch'è fin uss ina zona d'abitar e commerzi, daventa mo pli zona d'abitar. L'autra revisiun pertutga l'areal «Stiftbungert West» en vischinanza dal chastè da Zezras. Là datti ussa la basa per stgaffir in quartier cun spazi d'abitar e commerzi.
Val Müstair
La taglia sin immobiglias resta tar 1‰, quai han decis ils da Val Müstair. Cun 72% Na han ils votants e las votantas refusà la proposta da la suprastanza communala, d’auzar la taglia sin immobiglias sin 1.5‰. I ha dà 347 cedels cun Na, e 131 cedels cun Gea. La presidenta communala Gabriella Binkert Becchetti n'è betg surpraisa dal resultat, sco ella ha ditg envers RTR. Quai haja da far cun il giavisch da la glieud che la vischnanca guardia l'emprim nua spargnar. In connex cun las turbulenzas politicas da las davosas emnas na vesa Binkert Becchetti betg.
La suprastanza da Val Müstair aveva quintà, che l’augment da la taglia sin immobiglias portia radund 200’000 francs ad onn a la cassa communala. Quai avess meglierà la situaziun finanziala da la vischnanca. Uss sto la suprastanza ir sur ils cudeschs, tenor Gabriella Binkert Becchetti. I saja da reducir custs, investir auter e viver sin in pe in pau pli pitschen ils proxims onns.
Mustér
Per proteger meglier Mustér da las consequenzas da malauras, ha il suveran approvà il project da sanar il rempar da protecziun en la Val Acletta cun 81% da las vuschs. Ils custs per sanar il rempar, era donnegià tras malauras, muntan a 622'800 francs.
Scuol
Il suveran da Scuol adattescha l’urden da las zonas da ruaus per selvaschina. Igl è in fitg cler resultat, cun 913 Gea cunter 146 Na approvan ils da Scuol la revisiun da la planisaziun locala. Uschia è stgaffida la basa legala per adattar zonas da ruaus existentas, per signalisar meglier quellas e per crear singulas novas zonas da ruaus per selvaschina.
Lumnezia
La vischnanca sursilvana stritga ils fieus artifizials – era tar la midada da l’onn ed il 1. d'avust èn quels da nov scumandads. Il suveran da Lumnezia ha decidì in scumond general da fieus artifizials, cun approvar cun 88% da las vuschs la revisiun parziala da la lescha da l’urden public.
Per singulas occurrenzas, che na sa repetan betg – po la suprastanza da Lumnezia dentant conceder excepziunalmain ina lubientscha.