Las 10:00 ha l'acziun ch'è vegnida organisada dal moviment «chauma per il clima» cumenzà. Pliras organisaziuns per l'ambient èn sa participadas cun stans per lung la via da la staziun. Tenor la co-organisatura Selina Arquint saja ina finamira stada da sa barattar ed infurmar la populaziun davart las consequenzas da la midada dal clima.
La malobedientscha civila è per blera glieud memia radical. Tar l'acziun dad oz vai plitost per il dialog e forsa cuntanschain nus uschia dapli glieud.
Bloccar vias u discurs paschaivel?
Durant il di han ils activists ed las activistas empruvà da sensibilisar la glieud sin via. Tranter auter han els manà discurs cun il public e repartì flyers. Tar divers stans han las persunas pudì s'infurmar davart diversas organisaziuns per l'ambient.
La gronda part dals activists prefereschia talas acziun enstagl da malobedientscha civila cun bloccar vias e bancas. Tuttina èn ils blers stads da l'opiniun ch'i drovia omaduas strategias. Tar la malobedientscha civila survegnian ins per regla dapli attenziun, decleran plir activistas ed activists giuvens envers RTR.
Cunter Foodwaste
Tar in dals stans hai dà durant il mezdi la pussaivladad da mangiar gratuit: couscous e humus d'avant in per dis. Cun quella purschida ha il moviment vulì mussar si ch'i n'è betg necessari dad immediat bittar davent victualias ch'èn betg cumplettamain frestgas. «Foodwaste» in grond problem en Svizra, damai ch'in terz dals products che fissan anc mangiabels sa tschentan en il rument.
Impressiuns da la chauma
-
Bild 1 von 8Legenda: Couscous, chaschiel, tartuffels u humus d'avant in per dis. Il moviment «chauma per il clima» ha offert in gentar gratuit. RTR, Lukas Quinter -
Bild 2 von 8Legenda: Tar divers stans ha la populaziun savì s'infurmar. RTR, Lukas Quinter
-
Bild 3 von 8Legenda: RTR, Lukas Quinter
-
Bild 4 von 8Legenda: Var 150 persunas ha demonstrà tras la citad veglia da Cuira. RTR, Lukas Quinter
-
Bild 5 von 8Legenda: Era cun placats han ils demonstrants fatg attent sin la midada dal clima. RTR, Lukas Quinter
-
Bild 6 von 8Legenda: Tancar energia avant demonstrar. RTR, Lukas Quinter
-
Bild 7 von 8Legenda: In u l'auter discurs tranter generaziuns giuvnas e veglias per dapli chapientscha per il clima. RTR, Lukas Quinter
-
Bild 8 von 8Legenda: La co-organisatura Selina Arquint ha cun l'acziun vulì cuntanscher dapli sensibilitad per la midada dal clima. RTR, Lukas Quinter
Cun vusch ferma tras la citad
Da las 14:00 han ils demonstrants cumenzà da marschar tras la citad veglia. Tenor la polizia da la citad saja l'acziun stada paschaivla. Blers hajan purtà la mascra ordaviert, malgrà ch'i na saja betg stà necessari tenor la situaziun actuala da corona. Avant e suenter la demonstraziun èn vegnids tegnids differents pleds ch'han tematisà la protecziun d'ambient.