Sut la direcziun da l’Uffizi chantunal per il svilup dal territori vegn actualmain stgaffì ina plattafurma per ina procedura electronica per la permissiun da construcziun. La via digitala duai simplifitgar da far dumondas per construir, sanar u renovar in bajetg, sco il chantun scriva. E per ils uffizis chantunals e communals involvids duai vegnir pli simpel da giuditgar las dumondas. Quai na duai betg mo far pli svelta la procedura, mabain er pli transparenta.
La finamira è d’introducir la plattafurma sin l’atun 2023. Mintga vischnanca po lura decider sch’ella vul porscher a lur abitantas ed abitants la pussaivladad da nizzegiar questa plattafurma. D’inoltrar dumondas da construcziun sin palpiri resta dentant pussaivla. Il project fa part da la strategia dad e-government dal chantun.
Minimal 1'000 dumondas al mais
Las vischnancas grischunas survegnan mintg'onn tranter 12'000 e 19'000 dumondas da bajegiar. Da quai pertutgan radund 1'600 dumondas projects ordaifer la zona da construcziun. Quai pon esser stallas, sanaziuns da chasas da vacanzas, indrizs d'ennevar u provediments d'aua.