Il conflict brutal en il Sudan che dura dapi passa in onn ha chaschunà la pli gronda crisa da fugitivs ed ina da las pli severas crisas da fomaz dal mund. Passa nov milliuns persunas, tranter quellas quatter milliuns uffants, han stuì fugir or da lur dachasa e 18 milliuns persunas, bunamain la mesadad da la populaziun, èn periclitadas d'ina fomina.
Las organisaziuns partenarias svizras da la Chadaina da Fortuna èn activas en la regiun e prestan in agid umanitar d'impurtanza vitala en il Sudan, il Tschad ed il Sudan dal Sid. Ellas garanteschan tranter auter l'access al provediment medicinal, l'alimentaziun, l'aua da baiver e sustegn psicosocial. En vista a las suffrientschas da la populaziun pertutgada en il Sudan ed en ils pajais cunfinants appellescha la Chadaina da Fortuna urgentamain a la solidaritad per rinforzar ses agid.
Catastrofa umanitara emblidada
Dapi l'avrigl 2023 sa chatta la populaziun dal Sudan amez in conflict tranter l'armada dal Sudan e las «Rapid Support Forces» (RSF). Ils rapports da las Naziuns unidas e d'autras organisaziuns cumprovan grevas violaziuns dal dretg internaziunal umanitar, en spezial la violenza sexuala, las attatgas sistematicas sin la populaziun civila, la recrutaziun d'uffants schuldads e sblundregiadas sistematicas. La populaziun patescha d'ina mancanza acuta da victualias, d'aua netta e da provediment medicinal. Bunamain la mesadad da la populaziun è periclitada d'ina crisa da fom. Igl exista il privel d'ina fomina directa e l'access al provediment da sanadad è extrem precar. Las victimas principalas dal conflict èn uffants pitschens, dunnas en speranza e dunnas che tezzan. En tut dovran 24,8 milliuns persunas urgentamain agid umanitar.
Miren Bengoa, la directura da la Chadaina da Fortuna, di: «Il Sudan na dastga betg ir en emblidanza. Durant ch'autras crisas domineschan mintga di las lingias grassas, è la suffrientscha da la populaziun sudanaisa indescrivibla ed il basegn umanitar immens. Nossa solidaritad è urgentamain necessaria e per milliuns da dunnas ed uffants d'impurtanza vitala.»
Ina crisa regiunala
Il conflict en il Sudan ha consequenzas desastrusas per la regiun. L'affluenza massiva da fugitivs en ils pajais vischins ch'èn gia indeblids, augmenta la problematica da segirtad, d'alimentaziun e dal clima en la regiun e renda l'agid umanitar anc pli impurtant. Dapi il cumenzament dal conflict n'ha la Chadaina da Fortuna betg mo finanzià projects umanitars en il Sudan, mabain er en ils pajais vischins. Il drama ch'ha lieu en la regiun po vegnir evità, ma i dovra ina mobilisaziun urgenta per reagir immediatamain sin la crisa.
Agid da la Chadaina da Fortuna
La Chadaina da Fortuna presta agid umanitar sur sias organisaziuns partenarias svizras Caritas, Medair e Vétérinaires sans frontières dapi il cumenzament dal conflict ed ha sustegnì enfin uss sis projects cun totalmain 1,8 milliuns francs dal fond d'agid d'urgenza. L'agid da la fundaziun sa concentrescha fin uss sin las regiuns en il Sudan ed en il Sudan dal Sid, nua che blera glieud è fugida. En il center stattan il provediment medicinal, la furniziun da victualias sco era l'access ad aua da baiver netta ed ad indrizs sanitars. Las organisaziuns partenarias svizras da la Chadaina da fortuna prestan ultra da quai sustegn finanzial e psicosocial a famiglias ch'èn vegnidas stgatschadas da la guerra. In'attenziun speziala han uffants e dunnas en speranza u che tezzan.