Allegra Vorarlberg… - Scuvrir il Vorarlberg cun velo

Etappa 1: Schoppernau (Bregenzerwald)

L’emprim stop maina Ursin a Schoppernau, in pitschen vitg cun radund 700 abitants e ruassaivel. Pli baud vivevan ils abitants da l'agricultura, cumparegliabel cun nossas regiuns. Ozendi datti er in zic turissem.

Arrivar a Schoppernau en il Bregenzerwald n’è betg ì senz’incaps, Ursin ha stuì midar la ruta planisada pervi da naiv sin via. Però ha el chattà ina bella dimora tar ina famiglia purila che dat a fit chombras – ils hotels eran numnadamein serrads.

Etappa 2: Sonntag

Il segund paus d’Ursin è predestinà per ina sgnocca u l’autra cun ils dis da l’emna. Ma propi, la derivanza dal num «Sonntag» pudess schizunt avair ragischs rumantschas. Uschia almain ina teoria populara. Tenor quella teoria deva quai sper la baselgia il prà «de la dumengia» – pia da la dumengia.

Il pitschen e ruassaivel lieu ha Ursin cuntanschì tras tut l’aura. El e ses velo èn ids tras sulegl, plievgia, naiv e granella – pia in program variant da surengiu.

Etappa 3: Feldkirch

La terz’etappa d’Ursin ha procurà per ina midada da cuntrada – da las muntognas en la citad, a Feldkirch. In highlight da quest lieu è la Schattenburg, nua ch’ins po mangiar zunt bunas – e grondas – talgias panadas.

In segund eveniment spezial è da chattar en il parc d’animals selvadis da Feldkirch. Là ha Ursin vis capricorns uschè datiers sco anc mai. E schizunt lufs eran preschents. Il Vorarlberg ed il Grischun han bleras parallelas: Cuntrada, flora e fauna, vitgs, agricultura e turissem èn fitg sumegliants.

Etappa 4: Hohenems

Gia radund 100 kilometers ha Ursin fatg cun ses velo, ed uss è el arrivà a Hohenems – para in mecca da kino e da butias. En la citad cun bunamain 16’000 abitants ha noss reporter visità il «Palast Hohenems» ed è muntà sin in pitschen culm. El è i tras in guaud sin in trutg dasper bler d’agl urs – ed è vegnì recumpensà cun ina bellezza vista fin il Lai da Constanza.

Dasper quai eveniment ha Ursin discurrì cun il burgamester da Hohenems, e la saira sto el bunamain anc far ina visita a l’enconuschent cumplex da kino.

Ed a la fin

Intginas impressiuns dal viadi cun velo

asdf