RTR vegn a mussar durant l’emna dals 19-26 da matg ina dunsaina dad istorgias d’amur, istorgias da singles e da pèrins che raquintan avertamain da lur relaziuns, dad emprims inscunters, da crisas e dals misteris da l’amur. Las istorgias èn da vesair ed udir sin rtr.ch, tranter auter però era en il «Telesguard», en la «Marella» ed en ils «Cuntrasts».
![pèrin cun in cor](https://www.rtr.ch/static/cms/images/960w/a8a172.jpg)
«Tü nu dessast maridar»
Las Rumantschas e ils Rumantschs èn gea apparentamain campiuns dal chant. En il repertori da las chanzuns popularas sa zuppan era bleras chanzuns d’amur: «Buna sera biala», «Il randulin», «Silip e la furmia» ed autras. RTR vegn a preschentar sis da quellas chanzuns en in vestgì tuttafatg nov. L’illustratura Pia Valär ha numnadamain fatg si’atgna interpretaziun dal «randulin» e pertge che quel chanta «tü nu dessast maridar». L’entira seria da chanzuns d’amur illustradas è da chattar sin www.rtr.ch.
La saira d’amur
E vers la fin da l’emna culminescha l’emna amurusa da RTR en ina pitschna festa, en furma dad ina sairada ed emissiun deditgada a l’amur. L’emissiun da quella sairada, in’emissiun cun giasts, musica ed in u l’auter surrir, mussa RTR la saira dals 23-05-2019 sin www.rtr.ch.
Vulais era Vus participar a la sairada d'amur? Alura tramettai Voss'annunzia enfin ils 15-05-2019 a communicaziun@rtr.ch.
cura: mesemna, ils 22-05-2019 a las 20:00
nua: Theaterbar a Cuira
tge: apéro, musica ed ina sairada cun giasts e divertiment sut l'ensaina da l'amur
Il program “L’AMUR” da RTR è d’udir, vesair e da leger tranter ils 19–26 da matg 2019 sin tut ils chanals RTR.