Gisula Tscharner è ina da las emprimas teologas libras. Oriundamain preditganta, è ella sortida da la baselgia avant prest 25 onns. Dapi lura porscha ella rituals en la natira. Il film l’accumpogna durant in onn: dal rimnar ervas la stad al batten en la naiv enfin tar il passentar ina notg en il guaud cun la plievgia primavauna.
En ils onns 1990 ha Gisula Tscharner cumenzà cun far rituals ordaifer la baselgia. Da lezzas uras vegnivan plitost famiglias alternativas tar ella. Oz ha ella clients da tuttas classas socialas e da tuttas regiuns da la Svizra.
La plipart dals carstgauns en Svizra crajan vid „insatge superiur“, ma van en baselgia sin il pli da Nadal u en situaziuns da crisa. «Quellas persunas crajan vid insatge ed han il basegn da celebrar muments da transiziun», di Gisula Tscharner. «Ellas tschertgan la dimensiun mistica da la vita.»
Gisula Tscharner cumbinescha en sia lavur la spiritualitad cun sia cuschina da las dunnas selvadias, la „WildeWeiberKüche“. Ella enconuscha ervas selvadias sco paucs, ha creà recepts, scrit cudeschs e dà curs da cuschinar. Il divin na vegnia per ella betg da sisum, ma da la terra: «La savida da la vita è bler pli veglia che l’idea dal divin dal tschiel.»