Vita e cretta - Madras artifizialas, rusaris digitals e ritalin or da l’automat
Meglier, pli spert, pli ferm. Ma…vulain nus insumma quai?
En l’exposiziun «Super – Die zweite Schöpfung» ans confrunta il Museum da la communicaziun a Berna cun las pussaivladads d’optimar nus ed il mund cun agid da tecnologias modernas.
La biotecnologia, l'intelligenza artifiziala u la digitalisaziun, quellas teconologias dinamicas sa sviluppan cun grond tempo. Ellas pussibiliteschan a nus d’ans optimar en las pli differentas modas e manieras. Saja quai, che nus utilisain l’agid da l’internet sin tut ils champs pussaivels, u per exempel l’agid da roboters, ubain da la tecnologia genetica. Dentant n’è blera glieud betg u mo pauc infurmada davart quellas tecnologias ed innovaziuns. E d'intginas ins po sa dumandar, schebain ellas èn moralmain ed eticamain giustifitgadas.
Nus ans stimulain cuntinuadamain. Quai entschaiva gia la damaun cun baiver café.
Il Museum da la communicaziun a Berna less far attent a quel fatg. Quai fa el cun l’exposiziun «Super – Die zweite Schöpfung». In'exposiziun multifara ed er provocanta. I vegn era preschentà in novum: Scenas da teater sco part da l’exposiziun.
Vita e cretta guarda davos las culissas da «Super – Die zweite Schöpfung».
Nus mussain las pli novas tecnologias ed innovaziuns e tge ch'ellas pussibiliteschan als umans en il futur. Nus mettain dentant era en dumonda ellas.