El ha procurà per lingias grossas l’emna passada en Svizra: «Kirchen verlieren Geld mit Immobilien», ha per exempel la gasetta «Blick» cità Ansgar Gmür. Gmür è stà il directur da l’Associaziun svizra dals proprietaris da chasas ed ha studegià teologia suenter sia pensiun. Cun sia lavur da master a la Facultad teologica da l’Universitad da Turitg ha Ansgar Gmür pudì sa deditgar a sias duas passiuns: las immobiglias e la religiun.
Da las 100 plaivs che jau hai interrogà per mia lavur han 42 inditgà ch’ellas na s’occupian insumma betg cun l’administraziun da lur immobiglias.
El ha fatg ina gronda retschertga ed è vegnì a la conclusiun, che la plipart da las plaivs catolicas e refurmadas en Svizra n’administreschan quasi betg lur edifizis sacrals e betg sacrals. Uschia giajan a perder milliardas da francs. «Malgrà che las baselgias sesan sin in stgazi d'aur, na fan ellas strusch raps cun quel. Anzi èn las immobiglias ina chargia finanziala per las baselgias. Jau na chapesch betg, pertge ch’ins na pensa betg pli economicamain en temps, ch’ils daners vegnan a mancar. Sche las baselgias n’han nagins daners pli na san ellas er betg pli ademplir lur duair social», constatescha Gmür. E gist tals daners duvrassan las baselgias en temps da la digren cuntinuada da commembers e commembras urgentamain, manegia Ansgar Gmür.
Jau na chapesch betg, pertge ch’ins na pensa betg pli economicamain.
Sco teolog chapeschia el natiralmain che edifizis sacrals hajan impurtantas funcziuns per l’entira societad cun esser monuments culturals. El haja qua dentant la tenuta ch’ins stoppia ubain reutilisar uschiglio tut tenor era strair giu tscherts edifizis.
En il Grischun resta la baselgia quasi anc en il vitg. Qua è la situaziun ina speziala.
Sco che Ansgar Gmür reagescha sin la decleraziun da las baselgias; ch’ellas na sajan naginas firmas d’immobiglias, sco che quel dilemma da las baselgias sa preschenta en il Grischun e tge schliaziuns pussaivlas ch’el vesa, raquinta Ansgar Gmür en «Vita e cretta».
