Il papa è omnipreschent als Dis mundials da la giuventetgna. El vegn venerà, gea adurà. Fundà l'onn 1986 da papa Gion Paul II, è il Di mundial da la giuventetgna er oz anc collià stretgamain cun il pontifex. Igl è la pli gronda festa catolica da la giuventetgna dal mund. Quatter milliuns participantas e participants ha dumbrà l'inscunter il 1995 a Manila – in record.
Sco giuven cartent sun jau savens sulet. Perquai fai bain da celebrar la cardientscha en cuminanza da temp en temp.
Er a Cuira ha lieu quest onn in Di mundial da la giuventetgna, numnadamain dals 3 enfin ils 5 da matg. Igl è l'ediziun regiunala ch'è mintg'onn en in auter lieu en Svizra tudestga. Mintga trais onns ha lieu in Di mundial da la giuventetgna naziunal, e mintga dus u trais onns envida il papa ad in inscunter internaziunal. L'ultima giada a Lissabon l'onn passà.
Tar ils puncts culminants dals Dis mundials da la giuventetgna tutgan catechesas, discussiuns, lavuratoris e concerts – e tar ils Dis internaziunals la scuntrada cun il papa. Alura celebreschan tuts e tuttas communablamain ina vigilgia ed in servetsch divin final.
Che talas scuntradas han in’influenza sin il clima e l’ambient, quai ans è natiralmain conscient. Perquai avain nus prendì differentas mesiras che duain reducir in pau l’impronta ecologica.
Sumegliant ma pli pitschen, vegn il program ad esser al Di mundial da la giuventetgna Cuira. Tge e co ch'ils giuvenils e las giuvenilas vegnan a festivar a Cuira, pertge che la cuminanza è uschè impurtanta per ils giuvens cristifidaivels e co che ina tala festa sa lascha giustifitgar en temps da la midada dal clima, da quai rapporta Vita e cretta.