Igl è in novum per Peter Conradin Zumthor (40): Quests dis preschenta il Teater Cuira «Loneliness Kills Anna», l’emprima inscenaziun dramaturgica dal percussiunist da Haldenstein. Quai vul dir: Zumthor ha scrit sez il toc, e la musica ha el cumponì ensemen cun Vera Kappeler.
Il toc tematisescha la solitariadad, in fenomen dal qual blera glieud veglia patescha. Nus avain inscuntrà Zumthor avant la premiera e discurrì cun el davart il sa sentir isolà, quant fitg ch'il destin da si'atgna mamma al ha intimà da scriver il toc – e tge ch'in policist englais ha da far cun ses project.
«Loneliness Kills Anna»
Tip persunal: «Symbiotic seeing» dad Olafur Eliasson
El è ina da las impurtantas vuschs da l'art che s'engascha per il meglierament dal clima: l'artist danais-islandais Olafur Eliasson. Enconuschent è il superstar da l'art per grondas installaziuns en gronds museums. Actualmain preschenta il Kunsthaus a Turitg sia exposiziun «Symbiotic seeing». Tge stat davos il hype? Nus avain dà in sguard.
La Reprisa: Bertilla Giossi als Dis da film a Soloturn
Bertilla Giossi ha pudì mussar ses film «Made in China – La digitalisaziun dal dicziunari rumantsch grischun» als Dis da film a Soloturn, l'unic film rumantsch. Nus avain accumpagnà l'autura en la sala da kino.
Litteratura
L’emprim cudesch da cuschinar „Pure Leidenschaft“ dal cuschinier da renum Andreas Caminada è ina decleraziun d’amur a sia patria ed ina reverenza a la cuschina simpla.