Flurina Hürlimann (22) è la possessura dal studio da tattoos «Pachific» a Cham (ZG). Là realisescha ella diversas ovras d'art sut la pel. Cun ses tattoos da «black work» e la moda e maniera patgifica dad ir enturn cun sia clientella, ha ella sa fatg in num en la branscha.
Betg lavur mabain passiun
Per Flurina Hürlimann è far tattoos dapli ch’ina lavur – per ella èsi ina onur da pudair utilisar la pel dad autras ed auters per sia art. Tenor ella è mintga tattoo pretensius – e perquai fetschia ella ina buna planisaziun avant la session da tetovar: Vul dir, ella sesa ensemen cun il client per definir tut fin al pli pitschen detagl.
Da dar l’art ad insatgi – per mai è quai in bellezza process.
Il num «Pachific» reflectescha la filosofia da Flurina Hürlimann. «Tattoos dovran temp», accentuescha ella. «Il studio da tattoo duai esser in lieu, nua che tut quai po capitar – far insatge, guardar ch’i vegn bel, uschia ch’i resta per la vita duranta.»
Lieu per sa sentir bain
Avant l'avertura da ses studio è l'entira famiglia sesida ensemen per chattar in bun num che correspunda al caracter dal spazi. Ella ha decorà sia localitad cun divers elements – sco chandailas envidadas u bain in canapé comfortabel - pia uschia sco en ina stiva nua ch'ins sa senta bain: Svelt è lura era il num stà sin maisa: «Pachific». Cun «Pachific» n'ha Flurina betg be creà in studio da tattoo, mabain in spazi nua che l'art ed il esser en cuminanza vegnan ensemen per eternisar in u l'autra istorgia individualla sut la pel.
Or da l'archiv
