«Il chant è mes paun da mintgadi», di Rilana Cadruvi Scherrer. Actualmain vegnia ses chant dentant in zic a la curta, di ella.
Cadruvi Scherrer è magistra da chant tar la Scola da musica Surselva, dirigenta e chantadura diplomada, e dapi in onn studegia ella teologia. Ella ha ensemen cun Clau Scherrer quatter uffants. Sper ses grond pensum quotidian, dirigia la dunna da 46 onns trais chors en Surselva. Il chor maschadà da baselgia da Glion, il Chor da la Scola claustrala a Mustér ed il Chor d’uffants da la Scola da chant Surselva.
Actualmain sa preparan la dirigenta e ses trais chors per «Trun conta», la Festa da chant districtuala da la Surselva dals 15 da zercladur a Trun. Parallel tar quai eveniment, van las preparativas per ils concerts en il rom da «Sut igl ischi 2024» il trais concerts multimedials da «Détgas e fatg(a)s d'ina perdetga metta», nua che Rilana Cadruvi Scherrer e sia famiglia è ferm involvida. Quai spers tut la lavur da famiglia e ses studi da teologia.
La forza per dar dumogn a tut vegn da surengiu e da mia amur per chant e musica
«Chantar da cuminanza ha in aspect social e religius che collia umans», di Rilana Cadruvi. En Vita e Cretta tradescha Rilana Cadruvi dapli da sia amur per chant, per la litteratura religiusa e l'impurtanza dal chant per la cuminanza.