El è naschì sco terz dad 8 uffants en simplas relaziuns a Trun. Ses dun d'analisar ed interpretar maletgs, si'ambiziun da sa profundar e sa scolar vinavant ed oravant tut ses curaschi d'empruvar novas metodas en l'applicaziun da novas tecnologias en il sectur da la radiologia, han fatg or dad el ina corifea en ses sectur.
In radiolog che guarda be ils maletgs n'è betg in bun radiolog, el sto adina era vesair il pazient.
Uschè intensiv sco el è s'engaschà per la radiologia, uschè intensiv s'occupa el dapi sia pensiun cun il scriver. Trais cudeschs ha el enfin uss scrit davart tematicas sco l'islam ed il cristianissem, il patriarcat e feminissem, la scienza e societad, il cletg e discletg ed anc blers auters temas. El lavuria si uschia dumondas e tematicas ch'interesseschan el. Cun leger e sa profundar en la materia emprendia el uschia mintga di fitg bler. Quai saja in'occupaziun fitg cuntentaivla.
Jau scriv en emprima lingia per far urden en mes chau.