Egualitad è per el dapli che mo ina floscla. Gia dapi blers onns s’engascha Gian Beeli (42) per l’egualitad en nossa societad, ils davos onns en spezial per ils dretgs da giuvnas e dunnas. Ed a partir da l’entschatta settember daventa el co-directur da l’Uffizi federal per l’egualitad da dunna ed um.
L’um oriund da Flem e che viva e lavura oz a Berna di per exempel che l’egualitad n’è ni in privilegi ni ina dumonda ideologica, mabain in dretg uman, scrit ella Constituziun.
L’uffanza saja la fasa centrala per in carstgaun per emprender tgi ch’ins è, di Gian Beeli. El sez è creschì si a Flem. Ses geniturs manavan in hotel. Pli tard ha el frequentà la scola chantunala a Cuira. El saja adina ì gugent a scola.
Ils conscolars avevan fadia cun mai perquai ch’jau era adina interessà en tut.
Suenter il studi da psicologia, rumantsch e filosofia ed il doctorat cun giuvens 25 onns fissan las portas per ina carriera en la perscrutaziun stadas avertas per el. Mo el ha decidì da turnar el Grischun ed ha avert ina pratica da psicologia.
«A mai mancava il contact cun il carstgaun.» raquinta Gian Beeli. Pli tard mida el tar il chantun e daventa manader dal post da cussegliaziun per l'agid a victimas dal Grischun. Là è el confruntà cunzunt cun dunnas che pateschan da violenza en la relaziun.
I na deva strusch in vitg nua che jau na saveva betg istorgias da dunnas ni era uffants che han patì da violenza.
Il 2019 ha Gian Beeli midà a Berna nua ch’el lavura oz tar l’Uffizi federal l’Uffizi federal per l’egualitad da dunna ed um. Tenor el haja dà in progress en Svizra quai che pertutga ils dretgs da las dunnas. I saja dentant anc adina uschia che dunnas hajan, sper las inegualitads tar las pajas, pli grev dad esser udidas.
El pledescha perquai per dapli diversitad tar ils models da viver, era tar ils umens. I saja necessari da sa dumandar co nus pudain tematisar l’esser um en in mund modern e co in engaschi per l’egualitad po vesair ora. «Betg tut ils umens ston esser promoturs da l’egualitad. Mo nus duvrain dapli variantas d’esser um, dapli variantas d’esser dunna per la fin finala daventar ina societad cun dapli diversitad.»