Frasas sco «opposiziun è impurtanta» u «dispita aveva da vegnir» ha Bernard Cathomas duvrà en sia preschentaziun da ses cudesch cun il num «Ein Weg zur Einheit in der Vielfalt». Pia ina via vers l'unitad en la varietad per rumantsch. Il cudesch scrit per tudestg mussa il svilup da la lingua ed era las schanzas che quest process ha purtà.
Jau hai discurrì 40 onns davart il Rumantsch Grischun en rumantsch, ils Rumantschs san tge che jau manegel.
Dentant ha el constatà che blers amis n'avevan nagin'idea da tge che va e tge muntada ch'il rumantsch grischun ha. Uschia ha el scrit per tudestg per mussar ch'era ina minoritad possia s’adattar al temp, di l'autur. Bernard Cathomas haja sapientivamain scrit in pledoyer. Uschia haja el gì ina pli gronda distanza cun scriver e pudì furmar in'atgna opiniun. En tut ha il rumantsch grischun numnadamain ina dimensiun emoziunala per Bernard Cathomas. Uschia è l'autur era vegnì emoziunal tar intginas explicaziuns u dumondas durant la preschentaziun.
E nua che il rumantsch grischun uss, quai resumescha el sin las davosas paginas. Bernard Cathomas di, che la lingua saja in fatg, ina realitad ed ina buna realitad. Tenor el haja il rumantsch grischun ina buna schanza dad ir vinavant.