Jeu less bugen presentar a Vus in quiz, caras lecturas e cars lecturs. Smineis Vus, danunder ch’ils suondonts citats derivan? «O, ch’el bitschass mei cun sia levzas! Pilver, tias carsinadas ein pli deliziusas che vin.» E lu: «Uarda, biala eis ti, mia amitga! Biala! Tes egls, columbas davos tiu vel da nialas. Tes cavels, ina muntanera cauras che retuornan dil cuolm. Tes seins ein sco dus anseuls, schumellins d’ina gazella che pasculeschan denter las hiacintas.» (Canzun 1,1; 4.1.5)
Havesses Vus sminau ch’els ein d’anflar en la Bibla, pli exact el «Cudisch dalla canzun»? Sco autur supponan ins il retg Salomon. En hebraic, pia el lungatg original dil Veder Testament, vegn il cudisch titulaus cun «La canzun dallas canzuns». Pia la «crème de la crème» da tut las 1005 canzuns che Salomon duei haver scret, sco quei che la Bibla tradescha.
Tes seins ein sco dus anseuls, schumellins d’ina gazella che pasculeschan denter las hiacintas.
Po dar, ch’ina ni l’auter ei surstaus, forsa schoccada ch’in tal lungatg flurus ed erotic ha anflau igl access en la Bibla. Surstada sun jeu era stada, cu jeu sun seconfruntada l’emprema ga cun quels texts che paran pauc religius. En mes egls inaga dapli in mussament, tgei scazis prezius che la Bibla cuntegn. Ed ils texts muossan era, ch’ei dat el Veder Testament buca mo uiaras e dispetas.
En quasi trenta canzuns descriva igl autur dil «Cudisch dalla canzun» l’amur denter um e dunna. Cun bellezia plaids ed exquisits patratgs. Cun maletgs ord il mund oriental, nunusitai per nies mund e temps actual. Jeu sai mo cussegliar quei reh fundus a talas e tals che vulan impressiunar il partenari ni la partenaria cun in lungatg poetic, amureivel che sveglia encarschadetgna e muments da magia. Ch’il cudisch ei vegnius integraus en la Bibla ei d’engraziar all’interpretaziun teologica che la carezia descreta seigi ina semeglia per la carezia denter Diu e siu pievel. Ni denter Cristus e sia spusa, la «Baselgia». Seigi sco ei vegli. A mi para quei cudisch biblic in bien exempel per cumbatter las tendenzas religiusas che disvaletteschan il tgierp, che plaidan dalla sexualitad davos maun e vesan en l’erotica in cunfar infernal. En ina sauna relaziun da carezia interhumana astga bia haver plaz. Jeu legel ils texts sco himni alla carezia cun sias dimensiuns corporalas, spirtalas e spiritualas. Mintga fuorma da profunda carezia cun tut sias dimensiuns ei la finala in regal da Diu.
