Sco student datti ina tema ch’ei ad ins adina sils calcogns. Igl ei in factur da stress che persequitescha tras igl entir studi. Tras tut ils semesters. Che caschuna aschia per in cert e constant livel da stress.
Ils daners.
Con bia ei aunc sil conto? Tonschi aunc per quei semester? Hai aunc avunda per la cassa da malsauns? Funcziuna il pagament al locatur?
Persunalmein hai jeu preferiu la viseta tier il dentist ad in’egliada sin miu e-banking. Indicar il plaid clav. Spitgar giu l’identificaziun. Il fladar vegn pli cuorts. La tensiun crescha. Visur alv. Quella huora pagina – carga, carga, carga. E lu. U levgiament ni morder unglas. Pagar quens – mintga gada cun in pign kick dad adrenalin.
Con bia ei aunc sil conto? Tonschi aunc per quei semester? Hai aunc avunda per la cassa da malsauns? Funcziuna il pagament al locatur?
Era far cumissiuns saveva vegnir tier ina experientscha da stress. Schar registrar tut ils products. La cassiera di la summa. Tener la carta vid igl apparat da pagar. Il fladar vegn pli cuorts. La tensiun crescha. Quei huora apparat – lavura, lavura, lavura. Ei para ina perpetnadad. Ins ha l’impressiun che l’entira stizun mira. E lu, crutsch verd. Tut bien. Levgiament. Far cumissiuns – mintga gada cun in pign kick dad adrenalin.
E quei hai jeu resentiu. Ina persuna cun intacta reit sociala e bien sustegn da stipendias. Tgunsch sulet in pign schatg dils sentiment da persunas che vivan al minimum d’existenza han. Di per di.
Segirtad finanziala gioga ina impurtonta rolla el beinstar persunal. Da quei vegn ins per pertscharts sch’ins viva ina gada cun mieds finanzials limitai. Ei muossa con impurtont che possess en fuorma da daners ei. Tgei influenza che quei ha sigl agir persunal. Conquistar, administar ni defender il possess – quei mida il carstgaun. Ei leventa en el in secuntener ch’el fa sut normalas circumstanzas, per 90% dil temps, buca. Ils ins dapli. Ils auters pli pauc. Deliberai diltuttafatg dad ei ein denton ils paucs.
Posses. El caschuna per dispettas en famiglias, vischnauncas, denter tiaras e ha fatg la baselgia tier quei ch’ella ei oz. Quei sveglia toch la damonda: Dessi per nossa societad negina autra moda e maniera co ir entuorn cun possess?
Ei dat segirafranc daditg ina massa inteligentas teorias, ch’ein descrettas en cudischs aschi gross sc’ina cutgna, che muossan alternativas. Purtau fretg ha negina. La tema da pupira, il sentiment da buca saver pagar paun e casada, quei sto haver aschi in effect catalisatoric sil carstgaun che nus vivin en quei sistem che nus vivin.