(sursilvan) Mintgaton fa ei bein da far in paus e semplamein inaga ir en sesez. Pertgei ei dat dis, nua ch’jeu sesentel sco sche jeu sgulass tras mia veta.
In tgau plein quitaus, sligiaziuns e biaras ideas. In temps nua ch’jeu sun creativa pir che mai. In temps plein energia.
Per miu contuorn eis ei magari nuota aschi sempel da viver dasperas. Ei marscha – mes patratgs ein pli sperts che mes plaids. Mintgaton hai jeu il sentiment da haver detg tut, mo emblidau da finir la construcziun. Jeu entscheivel en in cantun a far enzatgei e sun tuttenina tut enzanu’auter – quei senza haver finiu ina lavur.
In temps nua che jeu sun creativa pir che mai. In temps plein energia. Per miu contuorn magari nuota sempel da viver dasperas. Ei marscha.
El temps da mi’affonza scarpitschavel jeu savens sur mes agens peis. E savens erel jeu stada enta peis a memezza.
Denton enzatgei ha segir gidau mei atras la veta. Las normas da gliez temps. En scola per exempel veva ei num, detg cuort: seser, star eri, tedlar e luvrar. Per mei ein quellas reglas beinsavens stadas sco palancaus che han menau mei leu nua ch’jeu sun oz.
Ed igl ei propi sco’l proverbi di: Culs onns vegn ins veramein pli sabis. Duront mias scolaziuns hai jeu era empriu fetg bia sur da memezza.
Per exempel ch’il sgular ha, sco bia auter era, duas varts. Mia devisa ei d’empruar da midar el mintgadi il negativ el positiv. E d’ughegiar da star tier quei ch’ins ei.
Jeu sun in carstgaun fetg cuntent e hai anflau mia via. Ils dis da sgular tilel jeu a néz cun esser fetg creativa. Seigi cun scriver, zambergiar, organisar, far iert – semplamein cun esser en moviment. Quels dis lavurel jeu bugen cun gliestas da pendenzas che gidan a far in pass suenter l’auter ed emblidar nuot.
Ed il pli impurtont: prender peda d’anflar il ruaus intern. Quei ei forsa stau mi’emprema experienza en scola. Sch’jeu sun plein energia, lu reaghescha in ton da mia classa sin mei. La classa tegn in spieghel avon miu nas e di: Pren in mument dad ir en tetezza – fai in paus, enquera in bi liug solitari, seigi quei giuado ni semplamein a casa sin canapè.
Ni ch’jeu enquerel il ruaus ella natira, cun ir a spass cun mia famiglia e naturalmein tier nos animals da casa ed en special tiels cavals. Quels muments dattan a mi ragischs ed jeu sentel la tiara sut mes peis.
Ed ina caussa impurtonta en mia veta ei che jeu stoi buca far endretg a tuts. Jeu hai e dun tut, tenor mias habilitads e mes talents. Quei dat era cuntentientscha e ruaus intern.