(sursilvan) La davosa stad sundel jeu staus culla scol’aulta per ina jamna a Milaun ad ina jamna da studi. Strusch arrivai ei dad in pèr constudentas vegniu il giavisch da serender en direcziun Duomo. Leu ella vischinonza seigi numnadamein la stizun Luini che hagi ils megliers panzerottis da Milaun.
Daco buca, haiel tertgau. Da viadi cun gruppas lasch jeu numnadamein bugen decider tschels. Jeu suondel lu semplamein bugen. Tschipaditschap ir suenter e sulet stuer dar adatg da buca vegnir suten dad ina vespa. Il pluoder (surs. il cumpogn) ed jeu havein perquei e buca studegiau ditg ed essen semplamein suandai agl entir battaclanc da studentas e students dalla scol’aulta. Ch’ei seigi allura da far dapli adatg da buca vegnir suten dad ina lavina turists asiatics che dad ina vespa talianra ha intec fatg surstar. Tuttina essan nus en ina gruppa da radund 10 persunas arrivai tier quei Luini prest sper il Duomo.
Quei ha fatg gronda impressiun a mi. Ina pintga denton bun’ovra. E quei senza dar sinzur. In’ovra ch’el ha fatg buca per seprofilar, buca per igl agend account da social-media ed era buca cun grond bahau el num da Jesus. Mobein sulet per il concarstgaun ch’ei en pitgira.
Per saver entrar havein nus stuiu ir sper in um vi. Ils egls da quei um eran absents. Entamaun teneva el in cup. Gnervus calzerava el entuorn. Spidava adina puspei sin via e spitgava ch’in ni l’auter turist metta in daner en siu cup. Nus tuts havein denton ignorau quei um ed essan entrai. Aschi desinteressai sco quei ch’ins ignorescha halt en vacanzas la pupira duront ch’ins cuora dad ina attracziun a l’autra.
Entrai tier Luini spitgava ina gronda teca da take-away cun differents panzerottis. Empustau il giavischau – e tschun minutas pli tard era in ravugl da students dalla scol’auta puspei avon esch e magliava siu paunet frittau. Approfundaus en small-talk davart la consistenza e buontad da quei panzerotto haiel jeu viu agl ur da mia egliada co il pluoder ha bandunau persuls il Luini ed ha purtau a quei um che spitgava cul cup avon esch in panzerotti. E silsuenter eis el allura puspei vegnius tier la gruppa ed ha fatg sco sch’ei fuss stau nuot.
Negin ha viu quei. Ed el sez ha era mai detg ad enzatgi ch’el hagi purtau a quei um ina pintga tschavera. Quei ha fatg gronda impressiun a mi. Ina pintga, denton bun’ovra. E quei senza dar sinzur. In’ovra ch’el ha fatg buca per seprofilar, buca per igl agen account da social-media ed era buca cun grond bahau el num da Jesus. Mobein sulet per il concarstgaun ch’ei en pitgira. Chapeau pluoder!