(vallader) Nemo e Paulus. Forsa üna cumbinaziun ün pa curiusa. Dad üna vart la persuna na binara Nemo chi ha güsta guadagnà avant cuort a Malmö il ESC per la Svizra. Üna persuna chi disch da sai svessa ch’ella nun as identifichescha cun ün sex. Ella nun as sainta ni sco hom ni sco duonna. Da tschella vart l’apostel Paulus chi ha vivü avant 2000 ons illa Asia Minura – ün hom, per il qual i d’eira fich cler che chi’d es la differenza tanter homens e duonnas. L’apostel Paulus chi ha eir dit üna jada cha las duonnas hajan da taschair illa radunanza e dad as suottamettar als homens.
Nemo e Paulus – dimena duos persunas fich differentas. E listess daja üna gronda parallela. Para cha tuots duos portan in els listessa brama. Forsa han eir tuots duos fat üna jada listessa experienza. Per tuots duos esa cler cha finalmaing nun es il sex uschè important. I nu quinta finalmaing sch’inchün es üna duonna, ün hom o üna persuna na binara. Quai chi quinta propcha es tuot alch oter. Paulus scriva quai in sia charta als Galaters culs pleds seguaints: «Qua nun esa plü ne Güdeu, ne Grec, ne sclav, ne liber, ne hom, ne duonna; vus eschat tuots ün in Cristus Gesu.» (Gal 3,28)
Per tuots duos esa cler cha finalmaing nun es il sex uschè important. I nu quinta finalmaing scha inchün es üna duonna, ün hom o üna persuna na binära.
Nus tuots fain adüna darcheu l’experienza chi nun es uschè simpel dad ir intuorn cun polaritats e differenzas. E fich difficil vaina lura, scha quistas differenzas vegnan valütadas. I nu dà lura be plü las differenzas, dimpersè eir ün meglder ed ün pês. Alch es plü bel ed alch plü trid. Alch plü intelligiant ed alch plü pluffer. Alch plü important ed alch plü banal. Ed our da quistas valütaziuns naschan lura il rassissem ed il sexissem. L’hom es lura plü important co la duonna. La persuna europeica plü scorta co quella africana. Che plunder, cloman sco our d’üna bocca Nemo e l’apostel Paulus. Tuot quai nu tuorna, tuot quai nu quinta nöglia. L’unic important es quai cha minchün da nus es. Nempe ün esser unic e singular, nat our dal grond misteri etern – e per adüna collià ün cun tschel.