(Sursilvan) Jeu sun el quart semester alla scol’auta da pedagogia a Cuera. Quei bachelor fetgel per romontsch e tudestg. Ei setracta d’in studi fetg social che promova il contact da carstgaun tier carstgaun. Ei vegn detg a nus – ch’ins possi sligiar bunamein mintga problem cun discutar. E gest quei ei empau quei ch’jeu sedamondel il mument.
Jeu sedamondel, sche nus perdin buc da onn tier onn, da semester tier semester, dapli nies contact cun nos concarstgauns. Che nos handys sempon, gliez savein nus gia dapi daditg. A mi crodi denton en egl, che nus s’isolein momentan aunc pli fetg, muort quella KI – ni per romontsch la IA, l’intelligenza artificala.
Igl ei fetg cumadeivel – gie – ins sefida denton, tenor mei, memia fetg a quei programm.
Per romontsch datti aunc uss negina IA che po tener petg alla tudestga ni l’englesa. Quei ch’jeu scrivel cheu, vegn pia era vinavon ord mia atgna plema.
Per tudestg ei quei auter. Ei dat il chatgpt. Quei ei probabel la pli renomada pagina sin quei sectur da IA.
Il sistem ei sempels: ti scrivas certs plaids, certas damondas ni texts miez fini e camondas al chatgpt per exempel: «Curregia il text sin sbagls», «fai ord quels cavazins in text pli liung» ni «dai a mi la dretga risposta en 500 plaids». E zac – cuort suenter survegnas il text giavischau. Bien ed endretg.
Duront il studi vaiel da far massa preparaziuns, lavurs e presentaziuns. Sch’jeu prendel plaz ellas prelecziuns, sche sesel per gronda part davos tier diltut. Avon mei ein lu biebein 100 students e studentas cun lur 100 laptops. Tudi vesas, che zatgi ei vi da duvrar il chatgpt. Il medem maletg serepeta ella biblioteca. Zatgi ei adina grad vi da duvrar il chatgpt. En mintga lecziun e tier mintga lavur communabla – x-zanua ha adina zatgi agid da chatgpt.
Students, studentas, docents, docentas, emploiai, emploiadas, scribents, scribentas, schurnalists e schurnalistas. Il mument drovan tuts quei chatgpt sco agid per scriver.
Igl ei fetg cumadeivel – gie – ins sefida denton, tenor mei, memia fetg a quei program.
Ins accepta las informaziuns ch’ins survegn senza grond far patratgs. Danunder ch’il program va per las datas ed infos interessescha ils pli paucs. Ins sto simplamein sefidar allas funtaunas.
Il lungatg sco tal che vegn scret da chatgpt resent’jeu sco nunpersunal. Quell’intelligenza artificiala ei buc el stan, da scriver medemamein emoziunal ed empatic sco in carstgaun. Tgei ch’ei denton pli alarmont ei, ch’ins lai buc pli curreger ils concarstgauns ils texts. Il text vegn buc surluvraus dil visavi. Aschia perdin nus il contact in tier l’auter. Ins damonda buc il collega che sesa sper tei per agid, mobein il chatgpt. Ins lai buc s’inspirar dil vischin visavi tei, mobein mo pli dallas ideas da chatgpt.
Che quei instrument da scriver texts ei aunc uss mo aunc els calzers d’affons, fa a mi gronda tema. Vegnin nus pia a piarder nies talent da scriver unic e daventein aschia pli e pli fetg tier in duplicat? La tendenza di gie.
Jeu sundel pia cuntents ch’jeu sun Romontsch e che la technologia drova empau pli ditg per arrivar en nies lungatg. Ei viva il scriver.