Igl ei surprendent tgei success che serias han da present. Jeu haiel era mia preferida e sesel mintgamai plein tensiun il gliendisdis sera sin canapè avon la televisiun.
Dapi che jeu hai legiu il cudisch « Mensch sein » dils dus scribents Carel van Schaik e Kai Michel sesentel jeu traplada. S’audel jeu era tier quellas e quels che concedan allas persunas dallas serias in plaz el cerchel dils amitgs ? Lur tesa davart il success dallas serias sebasa sil patratg, che la televisiun remplazzi la cumpignia serimnada el temps prehistoric entuorn il fiug. Perquei ch’ils carstgauns dad oz vegnien pli e pli solitaris, creeschien els savens relaziuns cun las persunas virtualas en la televisiun. Gest serias portien ina regularitad e garanzia pils inscunters.
In interessant patratg! Insumma ha il cudisch scurlau pulitamein vid miu maletg dil carstgaun. Ils dus auturs serefereschan en divers secturs dalla veta sin nossa natira d’origin. Quella ch’ei seformada dil temps che nus eran aunc catschadurs e rimnadras. Quella natira dicteschi, tenor els, aunc adina ferm ils basegns humans. Aschia era quels dallas relaziuns ch’eran ed ein la basa pil viver e surviver.
S’audel jeu era tier quellas e quels che concedan allas persunas dallas serias in plaz el cerchel dils amitgs?
Tenor ils auturs vivevien ils carstgauns da gliez temps en gruppas dad intragliauter 25 persunas. Denter quellas persunas regevan stretgs ligioms. Quei era lur reit sociala che purtava in l’auter en buns e schliats temps. En quei cerchel saveva il singul semussar aschia sco quei ch’el era, cun ses deficits e sias varts tarlischontas. Senza stuer segiustificar e senza metter si mascra.
La situaziun da viver el temps actual cumpeglia in grond diember da persunas cun las qualas nus essan en relaziun. Schibein a moda reala, sco era virtuala. Pil pli ein quellas relaziuns luccas, temporaras, cun pauca stabilitad. Ei maunca la profunditad, quei saver sefidar en tuts graus, igl astgar semussar aschia sco ins ei. Tenor ils auturs vegn la munconza da talas relaziuns cumpensada entras materialissem. Che lezza alternativa sa buca remplazzar il concarstgaun ei evident.
Hmm... co stat ei tier mei ? Jeu pren avon da scriver ina gliesta cun quellas persunas che s’audan tier miu cerchel da stretgas relaziuns. Mirar sche jeu vegn sin 25. En quellas relaziuns vi jeu investar. Ed in da quels plaz vi jeu schar a quel che accumpogna mei adina e dapertut. El astga buca muncar !
