La dumengia suenter la fiasta da Pastgas retscheivan biars affons da confessiun catolica l’emprema ga la s. communiun. Quella tradiziun deriva digl emprem temps dils cristians. Els vegnevan battegiai la notg da Pastgas e targevan en quei di in vestgiu alv. Quel purtavan els duront in’entira jamna. Lu astgavan els passar l’emprema ga agl altar e retscheiver il paun dalla veta. Cun quella caschun mettevan els puspei giu il vestgiu alv. Il vestgiu alv ei aunc restaus per quei di da fiasta dils premcommunicants. Ord quei motiv vegn il di savens era numnaus Dumengialva.
E puspei eis ella cheu, la teila alva che ha accumpignau mes patratgs sur tut ils dis da fiasta. Curdada en egl era ella a mi enten leger igl evangeli da Pastgas. Jeu manegel cheu la teila alva, il lenziel, che schischeva giun plaun en la fossa vita. Il lenziel, el qual Jesus era vegnius zugliaus per metter en fossa. La teila era ussa danvonz. Mo mei veva ella enzaco pigliau.
Ed jeu hai sentiu: Quella teila era dapli che mo la teila per enzugliar il defunct Jesus. Ella cunteneva sia DNA.
E tuttenina vesel jeu en quei toc teila autras teilas che vevan giugau ina rolla ils davos dis dalla veta da Jesus. P.ex. la teila che Jesus veva duvrau la sera dalla Sontga Tscheina per schigentar ils peis a sias giuvnalas ed a ses giuvnals.
Ni la teila da Veronica, la dunna curaschusa che steva alla via dalla crusch. Ella veva tunschiu la teila a Jesus per schubergiar giu il suadetsch, sias larmas e siu saung.
La teila ha denton era mussau a mi il vestgiu da Jesus che la schuldada veva scarpau naven dad el e repartiu denter els.
Ed jeu hai sentiu: Quella teila era dapli che mo la teila per enzugliar il defunct Jesus. Ella cunteneva sia DNA. Ella cunteneva siu survetsch al proxim, sias larmas, siu saung, siu pitir. Denton leu, en la fossa, mussava ella vi sin la levada. La teila dil pitir e dalla mort era daventada ina teila dalla veta!
Mo cun la DNA da Cristus manegel jeu buca sia ierta genetic-biologica, mobein quella dalla cardientscha. Quella, che Jesus ei buca restaus en la mort, mobein ch’el ei levaus alla veta. E che exact quei stat era avon a nus cristianas e cristians che targein en cun il batten il vestgiu da Cristus. Schidadir in vestgiu cusius ord ils lenzeuls da Jesus. Quei ei era il vestgiu dils affons che retscheivan quels dis l’emprema ga la s. communiun, il vestgiu da Dumengialva. Jeu giavischel ad els ed a nus cristians da tuttas confessiuns, che nus purteien cun plascher e perschuasiun nies vestgiu cun la DNA da Cristus.