(sursilvan) «La Pietà» – Maria tegn siu fegl. Emplenida da grazia, para ella nobla, schegie ch’ella ei en cumpleina malencurada. Ella tegn siu fegl – era suenter sia mort. Tgei dolur ch’ella ha stuiu pitir. Tgei amur ch’ella demuossa en quei mument. Maria vegn festivada ils 8 da december, pia duront ils dis oranschs. Lein dar in sguard sin la damonda, nua che Maria ed ils dis oranschs encunter la violenza enviers dunnas secruschan.
Ina dallas peinas las pli tragicas ch’enqual dunna sto far tras ei: piarder igl agen affon. Magari ei negin culponts, magari schon, magari eis ei ina malsogna. Ch’igl affon seigi carschius, giuvens, nievnaschius ni aunc el venter dalla mumma: Ei fa nundetg mal. «L’olma vegn sco stratga ord il tgierp», di ina ni l’autra dunna. «La veta perda siu senn per in amen.»
El mund digital dat ei autras situaziuns. Fotografias privatas che vegnan derasadas encunter la veglia dallas dunnas ein mo in exempel. Tras sexualisaziun maligna e cun commentaris dubius e discriminonts vegn la persuna tratga tras la miarda. Tals problems veva Maria segir aunc buc. Mo tgi sa, tgei tschintschem che lieungas mallavadas han formulau davos siu dies ni directamein en fatscha. E quei enconuscha enqual dunna ozildi.
Maria ha cuort avon parturir stuiu ir a Betlehem, perquei ch’igl imperatur Augustus ha cumandau da registrar il pievel. Per ina dunna cuort avon parturir ein viadis zun stunclentus. Parturir en ina stalla sco Maria, senza spindrera ni agid medicinal, ei in’ experientscha che bia dunnas enconuschan sin quest mund. Per cletg sa quei ir bein.
Per tut quellas dunnas vala: La malencurada e las dolurs san esser zun grondas, mintgaton paran ellas nunsurmuntablas, savens era per igl um e per l’entira famiglia. Baul ni tard serevegnan bia mummas e dunnas. Ellas levan ed anflan nova forza. Ellas semuossan fermas e daventan in simbol: Violenza e dolurs san bein fierer ellas giun plaun. Mo era las dolurs vargan e daventan zacu in mument el vargau, van per part en emblidonza. Magari seregordan ellas dallas dolurs, mo las dunnas anflan anavos ell’atgna veta. Ellas levan e vivan cun nova vigur. Ellas vivan sco dunnas ch’enconuschan las dolurs e san gidar autras dunnas da surmuntar talas. Ellas daventan in simbol sco la statua «La Pietà» da Michelangelo.
L’ura da religiun è ina oasa da tempra religius-meditativa cun novitads or dal mund da las religiuns, predi/meditaziun e dapli.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.