(sursilvan) Jeu sun preschuadida che mintgin da vus ha udiu ni viu ils davos dis ils plaids: «Trun conta …» – Quella nova ei segir arrivada tochen el pli davos cantun dil Grischun. Duront il davos temps ein 950 cantaduras e cantadurs sepreparai per la fiasta da cant districtuala. Ed ussa vegn cantau da camifo. Sco ils organisaturs han fatg paleis, ei ina fiasta da cant dapli che mo cantar. Nus chors tgirein la cultura da cant ton profana sco ecclesiastica. Quella fiasta da cant ei era in’occasiun per sentupar e tgirar la cumpignia. E quei che jeu hai gia daditg fatg persenn: cantar fa cuntents.
E nus cantein cun nies chor a Trun denter auter la canzun «Bufatg»: «El streha mes cavels il vent, e tschontscha mo sut vusch, il vent. Metta tes patratgs bufatg en mia bratscha. Jeu portel els per tei tiels tes pli cars.»
Aschia vi jeu oz purtar a vus, buca cul vent, mobein cun plaids screts en la gasetta, enqual patratg sur dil cantar a casa.
E quei che jeu hai gia daditg fatg persenn: cantar fa cuntents.
Enten preparar miu «Pled sin via» hai sfegliau empau en gasettas ed artechels e sun vegnida alla conclusiun che schizun la medischina ha fatg persenn che cantar fa bein a tgierp ed olma.
In fatg ei che cun ina melodia sin las levzas va tut pli tgunsch ed ins damogna meglier il mintgadi. Atgnamein clar. Jeu schubregel era pli bugen cun cantar ni tedlar musica.
Mo cantar gida nus era a purtar dapli prestaziun. Nus vein dapli forza, curascha e perseveronza e savein supportar meglier ils craps da scarpetsch sin la via dalla veta.
Cantar ei era in bien recept per esser ni daventar ventireivels, in mied da sequietar, il cant sminuescha il squetsch da prestaziun ed il stress. Cantar gida encunter depressiuns e temas, cantar ei terapia pil lom.
Gie, cantar ei propi ina buna medischina – e nus essan gnanc cunscients da quei.
Mo sper tut quels remiedis ein nossas contribuziuns alla fiasta era la pagaglia per in onn da cant. El ver senn dil plaid nossas arbagias, ton pils dirigents e las dirigentas sco pils cantadurs e las cantaduras. Jeu sun loscha d’esser dalla partida. Igl ei bi da veser che tons sestentan per la cultura da cant. Jeu selegrel da seveser, sentupar e guder il cant dils chors.
E sche zatgi ei forsa vegnius pertscharts che cantar ei saun – ellas retschas dils chors hai segir aunc plaz per in ni l’auter. E sch’ins ha buca tonta curascha, san ins inaga entscheiver cun exercitar sut la duscha, duront ir cun auto ni eba cun schubergiar.