(sursilvan) «Fagei fin cun il survetsch divin dalla dumengia!» Quei ei stau il tetel d’ina columna ch’ei cumparida avon paucas jamnas ella gasetta tudestga «Die Zeit». Enstagl da far vinavon tochen che negin vegn pli en baselgia, meglier gia ussa far fin cun quella purschida. Lu hagien las baselgias temps ed energia per autras caussas. La plevonessa Hanna Jacobs ha provocau massa reacziuns cun siu meini.
Per exempel: Il survetsch divin san ins buca semplamein dismetter, el ei il center dalla cardientscha e dalla cuminonza. Zatgi auter ha detg: Il survetsch divin ei in ritual che dat tegn a massa carstgauns, era sch’els van buca mintga dumengia en baselgia. Ed ins ha era saviu leger: Finalmein zatgi che critichescha, co ei vegn sfarlatau resursas per ina minoritad.
Ella ha realisau, che survetsch divin sa succeder schibein en baselgia cun rituals e sacraments, sco era en auters loghens.
Clar ei ch’il diember da quels che van regularmein en baselgia, vegn adina pli pigns. Clar ei era: sper las dumengias culs bauns vits dat ei aunc adina survetschs divins che carmalan bia glieud en baselgia. E Hanna Jacobs ei era buca l’emprema che pretenda da far fin cun priedis e survetschs divins.
Per biaras reacziuns da lecturas e lecturs hai jeu gronda capientscha. Per quels ch’ein la dumengia bugen ora ella natira ni che gaudan semplamein il temps liber, sco era per quels che anflan ruaus e buns impuls en baselgia e cun far oraziun, ni era per quels che han anflau autras vias per viver lur spiritualitad.
Pli gronda breigia hai jeu cun quels che manegian che sulettamein quei che schabegi la dumengia avonmiezgi en baselgia seigi il ver. Ina teologa ha inaga raquintau, co ella ei vegnida en discuors cun jasters tier ina spassegiada cun lur tgauns. Beingleiti hagi ei dau intensivas discussiuns sur da damondas dalla veta, ed ella seigi sesentida sco en in survetsch divin interactiv. Ins vegn en discuors in cun l’auter, empren in da l’auter e vegn rinforzaus. Ella ha realisau, che survetsch divin sa succeder schibein en baselgia cun rituals e sacraments, sco era en auters loghens. Era leu nua ch’ins conta ensemen, nua ch’ins accumpogna differenta glieud, ni tier projects che dattan sustegn e speronza. Ei fuss gie propi in segn da paupradad, sche baselgia ed evangeli seconcentrassen sin ina ura ad jamna.
E co stat ei uss cul survetsch divin la dumengia? Jeu manegel che Hanna Jacobs hagi dau buns impuls. Mo enstagl da far fin cun il survetsch divin dalla dumengia, vuless jeu plitost ch’ins cali da definir baselgia cun il diember da quels che visetan ils survetschs divins. E sesarvi finalmein a novas structuras e fuormas, seigi quei uss la dumengia ni il luverdis.