Ursicin Gion Gieli Derungs ha passentà sia uffanza en Val Lumnezia. Suenter il gimnasi tip A a Mustér, ha el studegià filosofia e teologia a Roma, Tübingen e Turitg e finì cun la promoziun. Gia avant sia scolaziun universitara era Ursicin entrà en claustra a Mustér. La vita en claustra n'ha però betg pudì persvader il giuven teolog, uschia ch'el è sortì da la claustra. Silsuenter ha el instruì al gimnasi svizzer a Milaun. Oz viva Ursicin G.G. Derungs a Vella e Milaun.
En sia emprima collecziun d'istorgias exprima l'autur critica envers las structuras da la baselgia catolica. Quai era vegnì resentì sco provocaziun en circuls conservativs da la Surselva. Dapi lura ha Ursicin G.G. Derungs publitgà pliras autras publicaziuns en furma da cudeschs u en revistas. El ha er sa fatg in num sco redactur da la "Litteratura" e sco translatur da Shakespeare, Dante e Frisch en rumantsch. Ursicin G.G. Derungs publitgescha dapi divers onns era en gasettas rumantschas, en revistas e chalenders. Regularmain è el era d'udir cun "Impuls" al Radio Rumantsch.
Ovras:
Dapli
Prosa:
- Ils saltar dils morts (1982)
- Il cavalut verd (1988)
- Porclas (1988)
- La petta de spigias (1998)
- Fontamara (2003)
- Il temps dellas tschereschas (2007)
Dramatica:
- Siemi de mesastad (1985)
- Monas e minas (1996)
- Illusiuns quotidianas (2000)
- Passiun (2003)
Differentas translaziuns.
Distincziuns:
- 1. premi tar ina concurrenza da teater da la Lia rumantscha, 1984
- Incumbensas da lavur Pro Helvetia, 1979/1990
- Contribuziun ad in'ovra Pro Helvetia, 1998
- Premi da litteratura da la Fundaziun Schiller, 1999
- Incumbensas da translaziun Pro Helvetia, 1995 e 2003
- Premi da renconuschientscha dal chantun Grischun, 2004
