Nadal stat avant porta e bainprest vegn il bambin. Per ils uffants èsi cler, il bambin è quel che porta mintg'onn ils regals sut il pignol da Nadal. Ma, san ils uffants insumma tgi ch'el è? Nus avain visità la scola a Breil e Donat ed avain discurrì sur da Nadal cun las scolaras ed ils scolars.
Sin la dumonda, sch’els sappian, tgi ch'il bambin saja, hai dà bleras e fitg differentas respostas. Qua intgins exempels:
Jau crai ch'el possia sgular, uschiglio na pudess el betg sgular da fanestra en.
El è in uffant ch'è naschì en in parsepen.
El è in pop senza chavels.
Els tuts enconuschan il bambin ed ils blers san ch'el è era enconuschent sco Jesus, il figl da Dieu. Ils 24 e 25 da december vegn la naschientscha da quel festivà, pia ses di da naschientscha. Ils regals tutgan gia dapi blers onns tar la festa da Nadal. Igl è ina sort tradiziun. E per ch'il bambin sappia tge regalar als uffants, scrivan quels glistas da giavischs ad el. Era las scolaras ed ils scolars da Breil e Donat, han cleras ideas tge ch'els vulan avair sin Nadal: skis, in animal da plisch da Minecraft, in cudesch da leger, in globus, in tablet, legos euv. Blers giavischs, e giavischs da tuttas sorts.
Istorgia da Nadal ord vista dals uffants
La festa vegn celebrada da cristians sin l'entir mund cun differentas tradiziuns ed usits, tranter auter il chantar chanzuns da Nadal, barattar regals, decorar pignols da Nadal ed il star ensemen cun famiglia ed amis. Ma pertge festivesch'ins insumma Nadal? Scolars da la 2./3. classa da Breil e da la 5./6. classa da Donat raquintan ord lur vista l'istorgia da Nadal.
