Suns Europe 2024 - Linguas minoritaras da l’Europa ad Udine

Il Friaul, la regiun enturn Udine è gia en sasezza in inscunter da linguas minoritaras. Sper talian vegn qua discurrì oravant tut furlan (ina lingua ch’è pli datiers al ladin che al talian). Sper gliez datti in minoritad slovena ed insaquantas enclavas da lingua tudestga. Per in’emna ad onn vegnan qua anc diversas autras linguas minoritaras tiers. Il 2024 èsi qua da tadlar musica per rumantsch, furlan, sloven, neerlandais, basc, furlan, catalan, feroais, armen e valisic.

1 / 25

2 / 25

3 / 25

4 / 25

5 / 25

6 / 25

7 / 25

8 / 25

9 / 25

10 / 25

11 / 25

12 / 25

13 / 25

14 / 25

15 / 25

16 / 25

17 / 25

18 / 25

19 / 25

20 / 25

21 / 25

22 / 25

23 / 25

24 / 25

25 / 25

Sper diversas occurrenzas culturalas e litteraras è la concurrenza musicala da la sonda saira en il Teatro Nuovo Giovanni il punct culminant. Sco represchentant da la Rumantschia è Ivo Orlik alias Giganto vegnì elegì tranter divers musicists e musicistas rumantschas. Il rapper rumantsch segua cun quai a divers acts rumantschs che han per part era gia pudì gudagnar l’occurrenza europeica.

Deplorablamain n’hai quest onn betg bastà per in premi per la Rumantschia. Giganto ha cun sia gruppa cuntanschì il quart plaz tar il premi da la giuria ed il bun segund plaz tar il public.

Las gruppas da l’ediziun 2024

Sper la diversitad da linguas sa preschenta il festival ad Udine era cun ina varietad musicala. Ils nov acts participants sa movan tranter musica da pop, hip hop e rock fin tar tuns experimentals fitg artistics.

• Giganto (rumantsch)
• Tumbe (armen)
• Ynys (valisic)
• Marianne Veenstra (saxon bass)
• Remei de ca la fresca (catalan)
• Mice (basc)
• Nicole Coceancig (furlan)
• Silvurdrongur (feroais)
• Gushi (sloven en il Friaul)

Ed uschia tunan las differentas musicistas e musicists da tut l’Europa en lur lingua minoritara:
(mess ensemen dal SUNS Europ festival)