Ils 19 da zercladur ha el publitgà sia single nova «Ne me dites pas non», il favrer è el vegnì onurà cun in Swiss Music Award per sia ovra da vita. Ed uss po el festegiar ses 60avel. Stephan Eicher è naschì ils 17 d’avust dal 1960 a Münchenbuchsee e cun 21 onns ha el gì ses emprims success cun la band «Grauzone», quella giada cun musica en il stil da la «Neue Deutsche Welle».
L’amur per il chanson franzos
Ils success impurtants ha Eicher però mez dals onns 80 cun sias chanzuns per franzos ed englais e cun ils discs «I tell this night» e «Silence». Lura seguan albums fantastics sco «Engelberg» il 1991, «Carcassonne» il 1993, «1000 Vies» il 1996 e «Louanges» il 1999. E quels han er grond success commerzial, surtut er en Frantscha. Là è Stephan Eicher savens sin ils gronds palcs, er en il Olympia a Paris.
Collavuraziun cun Philippe Djian
Bleras da sias chanzuns derivan da la collavuraziun cun il poet franzos Philippe Djian. El ha scrit ils texts per semperverds sco «Pas d’ami (comme toi)» e «Déjeuner en paix».
Il film «Unerhört jenisch» dal 2017: Eicher e sias colliaziuns cun ils viagiants
Stefan Eicher, il chantautur e rockadur renumà, va er en tschertga da sias ragischs. El riva er en il Grischun tar las famiglias Moser, Waser e Kollegger, famiglias da viagiants ch'èn sa domiciliadas a Vaz e che han ina gronda colliaziun cun la musica populara.