«Oesch’s die Dritten», quai è ina dinastia musicala cun gronda tradiziun. Gia lur tat Hans era in musicant da vaglia ed er Hansueli Oesch ha suna en diversas furmaziuns, uschia er tar la chapella «Schwyzerörgeliquartett Stockhorn». Uss è lur chapella da famiglia en il center, cun Hansueli ed Annemarie, lur uffants Kevin, Mike e Melanie e l’accordeonist Urs Meier.
Grond success e bler platin ed aur per lur discs
Gia dapi 23 onns fan els musica, e quai cun grond success. «Die Dritten», quai vul dir: la terza generaziun, pertge gia il tat e lur bab han sunà en pliras furmaziuns. Uss è lur furmaziun ina da las pli popularas en Svizra ed ha er success en Austria e Germania ed els han fatg sur 1'700 concerts en 14 pajais ed han ramassà discs d’aur e platin per la vendita da lur albums.
«Oeschs die Dritten», quai era l’emprim ina furmaziun cun ils uffants che faschevan musica e chantavan e che fascinavan il public. Il 2007 han els gì lur emprim grond success cun il disc «Jodelzauber» – e cun il «Ku-Ku Jodel» datti in onn pli tard in semperverd ch’ins enconuscha anc adina. La furmaziun da famiglia è lura stada giast en emissiuns da radio e televisiun sco il «Musikantenstadl». E lur popularitad crescha, surtut er pervi da Melanie Oesch che chanta e jodlescha, il star da la famiglia ch'è vegnida mamma la primavaira passada.
Uss è cumparì lur 10avel disc «Die Reise geht weiter» che cuntegna puspè blera musica populara cun orgelet, chant e jodel, però er in pèr melodias che vegnan d’auters cumponists.
