Avant curt ha il Hip Hop festivà ses 50avel anniversari – la scena Grischuna ses 30avel. Ins po pia dir ch’il Hip Hop ha gia in pau experientscha da vita. Cumenzà ha tut a New York cun «Kool DJ Herc». El è stà l’emprim DJ ch'ha prendì il ritmus da chanzuns da Funk, Soul e Disco, repetì quels enstagl da prender l’entira chanzun e cumenzà da maschadar dus differents ritmus – l’uschenumnà «Beatjuggling».
La tgina dal rap n’è betg uschè clera. 1970 han per exempel ils «Las Poets» cumenzà cun rap politic. Parallel han dentant era auters MCs (Masters of Ceremony) cumenzà ad accumpagnar DJs. A l’entschatta han quels MCs beneventà il public ed animà tranter las chanzuns dal DJ da sautar.
Uschia è quella scena sa sviluppada enavant ed ha era chattà la via en Svizra. Oz è Hip Hop la pli gronda cultura da pop sin l’entir mund.
Hip Hop en il Grischun
Igl ha cuzzà in pau enfin ch’il Hip Hop è arrivà en Svizra ed en il Grischun. Ed anc in zic pli ditg enfin ch’ils emprims MCs e DJs èn sa mussads. «Money Honey» da «Rapilepsie» dal 1992 saja la chanzun che saja stada l’entschatta dal rap grischun, di «Gimma», in dals pioniers dal Hip Hop grischun. Probablamain haja gia dà avant chanzuns en quest stil, dentant n’èn quellas betg vegnidas enconuschentas. Avant 30 onns hajan ins propi anc pudì discurrer d’ina scena pitschna.
Il moviment da Hip Hop en il Grischun è lura creschì immens ils emprims diesch onns. L’idea saja d’esser ina scena per in e scadin e cun bleras cumponentas visuals sco il saut u era il streetart.
Live en l’emissiun
Ils ultims onns èsi dentant vegnì pli ruassaivel. Ils pioniers da l’emprima ura n’han betg pli fatg uschè blera musica e novs èn paucs vegnì suenter. Trais da quella generaziun nova èn per quest’emissiun vegnì en la Lounge: «Gigi», «Giganto» e «Sirius».
Il giuven «Sirius» alias Djego Deflorin da Laax fa dapi plirs onns musica. Cumenzà plitost per sasez ha el fin uss gia publitgà plirs albums e lavura stedi vi da nova musica. La stad 2023 ha el publitgà sia EP «Viva» cun sis chanzuns.
«Giganto» alias Ivo Orlik na pon ins betg pli titular sco newcomer en la scena dal rap rumantsch. 2013 ha el publitgà ses emprim album «G-Punct» è dapi lura adina puspè preschentà nova musica en differents stils, dentant adina fidaivel al rap.
Ina ch’empermetta bler è la giuvna «Gigi» alias Giulia Gort. Avant bun dus onns è ella per l’emprima giada sa mussada sco rappadra sin la tribuna ed ha dapi lura gia fatg gronds pass en sia carriera. Tranter auter è ella sa preschentada al Cypher da SRF Virus – nua che ses video è stà in da quels cun il pli grond success.
